Enskir fjölmiðlar greina frá því í dag að markmaðurinn stóri og stæðilegi, Thibaut Courtois, sé búinn að semja við spænska knattspyrnufélagið Real Madrid á Spáni. Courtois hefur verið aðalmarkmaður Chelsea frá árinu 2015 en samningur hans við enska félagið rennur út á næsta ári.
Hann hefur ekki viljað skrifa undir nýjan samning við Chelsea en markmaðurinn hefur verið sterklega orðaður við Real Madrid í allt sumar. Mail greinir frá því að Courtois sé búinn að gera munnlegt samkomulag við Real Madrid um að ganga til liðs við félagið.
Ekkert samkomulag er hins vegar í höfn á milli félaganna tveggja en Chelsea gæti freistast til þess að selja hann núna, frekar en að missa hann frítt næsta sumar. Courtois vill spila í Meistaradeild Evrópu á næstu leiktíð en Chelsea endaði sem kunnugt er í fimmta sæti ensku úrvalsdeildarinnar og mun því leika í Evrópudeildinni á næsta tímabili.