Rodri, miðjumaður spænska knattspyrnufélagsins Atlético Madrid, hefur tjáð spænska félaginu að hann vilji fara í sumar en það eru enskir fjölmiðlar sem greina frá þessu. Rodri hefur verið sterklega orðaður við Manchester City í allt sumar og er talið næsta víst að leikmaðurinn muni skrifa undir í Manchester á næstu dögum.
City þarf að borga rúmlega 60 milljónir punda fyrir þennan öfluga miðjumann sem er einungis 22 ára gamall. Bayern München hefur einnig fylgst náið með leikmanninum í gegnum tíðina og er þýska félagið tilbúið að borga uppsett verð fyrir leikmanninn en Rodri sjálfur vill komast til Englands og spila fyrir Pep Guardiola.
Rodri kom við sögu í 34 leikjum með Atlético Madrid í spænsku 1. deildinni á síðustu leiktíð þar sem hann skoraði 3 mörk og lagði upp 1. Hann spilar sem varnarsinnaður miðjumaður og á að baki 6 landsleiki fyrir spænska landsliðið en hann spilaði sinn fyrsta landsleik árið 2018 þegar hann kom inn á sem varamaður gegn Þýskalandi.