Steve Bruce hefur verið ráðinn knattspyrnustjóri Newcastle til næstu þriggja ára en félagið greindi frá þessu fyrir stundu.
Bruce yfirgaf enska B-deildarliðið Sheffield Wednesday á mánudaginn og tekur við stjórastarfinu hjá Newcastle í stað Rafael Benítez sem nýlega tók við þjálfun kínverska liðsins Dalian Yifang.
„Ég er ánægður og ótrúlega stoltur að hafa verið ráðinn knattspyrnustjóri Newcastle. Þetta var liðið mitt í æsku og var félag föður míns. Þetta er því sérstök stund fyrir mig og mína fjölskyldu,“ segir Bruce á vef Newcastle.
Bruce, sem er 58 ára gamall, tók við Wednesday í janúar á þessu ári eftir að honum hafði verið sagt upp störfum hjá Aston Villa í október, en þar hafði hann verið stjóri í tvö ár.
Áður hefur Bruce stýrt liðum Hull, Sunderland, Wigan, Birmingham, Crystal Palace, Huddersfield og Sheffield United. Hann lék á sínum tíma 737 leiki í ensku deildakeppninni og þar af voru 309 leikir með Manchester United.
Newcastle United can now announce that Steve Bruce has been appointed as the club's new head coach.
— Newcastle United FC (@NUFC) July 17, 2019
More here: https://t.co/BTjZACgqtb #NUFC pic.twitter.com/IvhafgljYf