Pep Guardiola, knattspyrnustjóri Manchester City, var sposkur í svörum þegar hann ræddi við fjölmiðla eftir óvænt 3:2-tap liðsins gegn nýliðum Norwich í 5. umferð ensku úrvalsdeildarinnar í knattspyrnu í gær.
Englandsmeistararnir voru ekki sjálfum sér í leiknum og eru nú strax fimm stigum á eftir Liverpool í toppbaráttunni en Spánverjinn geðþekki gaf lítið fyrir stöðu liðanna á þessum tímapunkti.
„Það er bara september, hvað á ég að segja? Allt í lagi, til hamingju, Liverpool, þið eruð meistarar. Það er september!“ sagði Guardiola er blaðamenn bentu honum á stigamun liðanna.
„Nú bara höldum við áfram, við erum búnir að tapa fimm stigum en svona er þetta. Ég mun ekki efast um leikmennina mína í eina sekúndu.“