Svissneski miðjumaðurinn Granit Xhaka verður ekki í leikmannahópi Arsenal á morgun þegar liðið sækir Leicester heim í ensku úrvalsdeildinni í knattspyrnu.
Unai Emery knattspyrnustjóri Arsenal staðfesti þetta á fréttamannafundi í dag en Xhaka var á dögunum sviptur fyrirliðastöðunni hjá Lundúnaliðinu og var Pierre-Emerick Aubameyang skipaður nýr fyrirliði.
Xhaka brást illa við bauli stuðningsmanna Arsenal er hann var tekinn af velli í 2:2-jafntefli við Crystal Palace á dögunum og blótaði þeim í sand og ösku er hann gekk af velli. Strunsaði hann svo beint til búningsklefa.
„Ég ræddi við hann á þriðjudaginn og spurði hvernig hann hefði það andlega. Hann sagðist ekki vera tilbúinn að spila strax og við þurfum því að bíða,“ sagði Emery.
Þetta verður fjórði leikurinn í röð sem Arsenal spilar án Xhaka en framtíð hans hjá Lundúnaliðinu er í mikilli óvissu.