Jadon Sancho, sóknarmaður Borussia Dortmund, hefur verið einn eftirsóttasti knattspyrnumaður Evrópu undanfarna mánuði og ensku götublöðin færa nú fregnir af því að hann muni loks snúa aftur til Manchester í janúar.
Sancho er uppalinn hjá Englandsmeisturum Manchester City en hann flutti sig yfir til Þýskalands og hefur staðið sig vel í efstu deild þar í landi. Hann er 19 ára gamall og byrjaður að banka á dyrnar hjá enska landsliðinu en hann hefur skorað fjögur mörk fyrir Dortmund á tímabilinu.
Bæði The Mirror og The Sun greina frá því að Ole Gunnar Solskjær, knattspyrnustjóri Manchester United, hafi sagt yfirmönnum sínum að klófesta Sancho í janúar en hann er metinn á um 80 milljónir punda. United hafði áhuga í sumar en Sancho vildi halda kyrru fyrir í Þýskalandi og þá var óvíst hvort hann hefði áhuga á að spila fyrir erkifjendurna í United.
Félagið er hins vegar sagt tilbúið að gera við hann risasamning svo að hann komi til félagsins en United þarf nauðsynlega á fleiri sóknarmönnum að halda.