Arsene Wenger, fyrrverandi knattspyrnustjóri Arsenal, er ekki sáttur við ummæli eftirmanns síns í stjórastól félagsins, Unai Emery. Emery sagði í viðtali við France Football á dögunum að Arsenal hefði verið á niðurleið þegar hann tók við.
„Við stoppuðum niðursveifluna og vorum byrjaðir að rétta félagið við með því að komast í úrslitaleik Evrópudeildarinnar og enda í fimmta sæti úrvalsdeildarinnar, bara stigi á eftir Tottenham þrátt fyrir að við fengjum aðeins eitt stig í síðustu fimm leikjunum,“ sagði Emery m.a.
Wenger er ekki sammála Spánverjanum, sem var rekinn í nóvember á síðasta ári. „Við fengum 75 stig og unnum enska bikarinn árið 2018, svo það er ekki hægt að segja að við værum á niðurleið. Árið á undan enduðum við í öðru sæti.
Arsenal er í mjög sterkri stöðu fjárhagslega, með góða leikmenn og þegar þú ert stjórinn verður þú að taka ábyrgðina, en ekki líta í kringum þig í leit að afsökunum,“ sagði Wenger við blaðamenn á Laureus-hátíðinni í Berlín í gærkvöld.