Franska knattspyrnufélagið PSG fékk í dag formlega viðvörun frá UEFA fyrir fagnaðarlæti leikmanna liðsins er það sló Borussia Dortmund úr leik í Meistaradeild Evrópu fyrr í mánuðinum.
Erling Braut Haaland skoraði bæði mörk Dortmund í 2:1-sigri á heimavelli í fyrri leik liðanna og í báðum tilvikum fagnaði hann á sinn einstaka hátt; með því að fara í jógastellingu.
PSG vann síðari leikinn 2:0 á heimavelli sínum og fór því áfram í átta liða úrslit. Neymar fagnaði fyrra marki liðsins á sama hátt og Haaland fagnar sínum mörkum og gerðu flestir leikmenn PSG grín að Norðmanninum með að fagna eins og hann í leikslok.
UEFA var ekki hrifið af uppátækinu og hefur nú aðvarað PSG fyrir óíþróttamannslega framkomu.