Enski knattspyrnumaðurinn Danny Rose segir skrítið að fólk vilji segja atvinnumönnum í íþróttinni hvað þeir eiga að gera við peningana sína.
Mikil pressa hefur verið á knattspyrnumönnum á Englandi og vilja margir að þeir taki á sig launalækkun og gefi hluta launanna til heilbrigðisþjónunnar. Heilbrigðisráðherrann Matt Hancock er einn þeirra.
„Ég vaknaði í morgun og sá að stjórnmálamenn vilja að ég gefi launin mín. Það er verið að stilla okkur upp við vegg. Ég hef ekkert á móti því að gefa hluta launa minna til þeirra sem eru að berjast í framlínunni og þeirra sem eiga erfitt.
Það er hins vegar skrítið að fólk sé að segja mér hvað ég á að gera við mína peninga,“ sagði Rose við BBC. Rose er sem stendur að láni hjá Newcastle frá Tottenham.