Gleymdi maðurinn skoraði ógleymanlegt mark (myndskeið)

Það eru orðin 11 ár síðan Federico nokkur Macheda, þá 17 ára og óþekktur knattspyrnumaður, gerði vonir Liverpool að engu í baráttunni um enska meistaratitilinn vorið 2009.

Gömlu erkifjendurnir Manchester United og Liverpool áttu í hnífjafnri baráttu um toppsætið á Englandi en skriðþunginn virtist allur vera með félaginu úr Bítlaborginni eftir frækinn 4:1-sigur á Old Trafford undir lok mars. United tapaði næsta leik á eftir og var skyndilega aðeins stigi á undan Liverpool eftir að hafa átt myndarlegt forskot nokkrum vikum áður.

Liverpool hirti svo toppsætið af nágrönnum sínum tímabundið, með því að leggja Fulham á laugardeginum, en degi síðar, sunnudaginn 4. apríl 2009, kom Aston Villa í heimsókn til Old Trafford. Cristiano Ronaldo var nokkuð sparkviss á þeim tíma með rauðu djöflunum og skoraði tvö mörk í leiknum en þeir John Carew og Gabriel Agbonlahor skoruðu fyrir gestina. Staðan var jöfn, 2:2, þegar sir Alex Ferguson, stjóri United, henti 17 ára ítölskum gutta inn á völlinn í fyrsta sinn.

Undir blálokin skoraði drengurinn svo eftirminnilegt sigurmark, seint í uppbótartíma, og tryggði United mikilvæg stig í toppbaráttunni. Markið er ekki síður eftirminnilegt fyrir það hvernig rödd sjónvarpsmannsins Martins Tylers brast þegar hann lýsti leiknum.

Ítalinn skoraði annað mark í næsta leik og spilaði fjóra leiki, það sem eftir var tímabils. Stuðningsmenn United sáu feril Macheda í hillingum en ekkert varð þó úr því. Hann spilaði aðeins 19 leiki fyrir félagið og skoraði fjögur mörk á nokkrum árum og hefur síðan komið við víða um alla Evrópu.

Í dag spilar hann með liði Panathinaikos í Grikklandi, 28 ára gamall, en honum tókst aldrei að spila nema með unglingalandsliðum Ítalíu. Markið gegn Aston Villa gleymist engu að síður seint og hafa margir rifjað það upp á samfélagsmiðlum í dag. Þeirra á meðal er Daniel Harris, blaðamaður Guardian, en markið má sjá í myndskeiðinu hér að neðan.

• Blogga um frétt