Ole Gunnar Solskjær, knattspyrnustjóri Manchester United, hefur staðfest að þeir Paul Pogba og Marcus Rashford verði báðir heilir heilsu og í leikstandi þegar enska úrvalsdeildin hefur göngu sína á ný.
Rashford varð fyrir bakmeiðslun í byrjun árs og hefði átt að vera frá út tímabilið og Pogba hefur ekkert spilað síðan í desember eftir að hafa farið í aðgerð á ökkla. Fresta þurfti öllu mótahaldi vegna kórónuveirunnar í mars. Nú stendur til að hefja keppni aftur í júní og eru báðir leikmenn byrjaðir að æfa á fullu með liðinu.
„Þeir líta vel út, taka þátt á æfingum og geta gert allt það sama og hinir í hópnum,“ sagði Solskjær í viðtali við MUTV, sjónvarpsstöð félagsins. „Ég reikna með að allir verði heilir í hópnum þegar við getum byrjað aftur.“