Timo Werner, framherji þýska knattspyrnufélagsins RB Leipzig, hefur samþykkt að ganga í raðir Chelsea í sumar en Lundúnaliðið ætlar að borga 60 milljónir evra fyrir leikmanninn. Werner hefur lengi verið eitt helsta skotmark Liverpool en sofandaháttur Jürgen Klopp og félaga virðist hafa kostað þá einn öflugasta framherja Evrópu.
Það er Daily Mail sem segir frá því að Chelsea ætli að nýta sér ákvæði í samningi Werner sem segir að Leipzig verði að samþykja tilboð upp á 60 milljónir í hann. Þá ætlar liðið að borga honum um 200 þúsund evrur í vikulaun. Werner hefur raðað inn mörkunum í þýsku 1. deildinni á tímabilinu en hann hefur skorað 25 mörk í 29 leikjum í deildinni á tímabilinu. Þá skoraði hann fjögur mörk í átta leikjum í Meistaradeildinni á tímabilinu.
Liverpool er sagt ekki tilbúið að borga upp þessa klásúlu, meðal annars vegna efnahagsáhrifa eftir kórónuveirufaraldurinn. Samkvæmt fréttinni hafa forráðamenn félagsins verið að draga úr áhuga sínum á leikmanninum sem var sagður efstur á óskalista Klopp fyrir fáeinum vikum. Þjóðverjinn var m.a. sagður hafa hringt í leikmanninn til að sannfæra hann um að koma til Bítlaborgarinnar. Forráðamenn Chelsea virðast hins vegar vera að nýta sér sofandahátt Liverpool og virðist sem einn öflugasti framherji Evrópu spili í Lundúnum næsta vetur.