Enska knattspyrnufélagið Manchester United þarf að taka ákvörðun um hvort það ætli að kaupa sóknarmanninn Jadon Sancho frá Dortmund fyrir 10. ágúst en forráðamenn þýska félagsins ætla ekki að leyfa óvissu að ríkja um framtíð leikmannsins eftir þann tíma.
Sancho hefur lengi verið eitt af aðalskotmörkum Ole Gunnar Solskjær, knattspyrnustjóra United, og hafa fregnir um fyrirhuguð kaup United á leikmanninum orðið sagan endalausa í fjölmiðlum. Enska götublaðið The Mirror segir nú frá því að forráðamenn Dortmund hafi fengið sig fullsadda af orðrómum.
Dortmund er tilbúið að selja leikmanninn fyrir uppsett verð en hann kostar í kringum 100 milljónir punda. United er sagt vilja borga minna, eða um 70 milljónir, fyrir enska landsliðsmanninn sem er aðeins tvítugur að árum. Vilji enska félagið bjóða, verði það hins vegar að gera það fyrir 10. ágúst ella er leikmaðurinn ekki til sölu.
Sancho er uppalinn hjá Manchester City. Leikmaðurinn vill sjálfur komast aftur til Englands eftir þrjú ár í Þýskalandi þar sem hann hefur slegið í gegn. Hann hefur byrjað 25 leiki í þýsku 1. deildinni á tímbilinu þar sem hann hefur skorað 17 mörk og lagt upp önnur 16.