Ítalska knattspyrnufélagið Inter Mílanó og Manchester United á Englandi hafa komist að samkomulagi um að Sílemaðurinn Alexis Sánchez gangi í raðir ítalska félagsins á frjálsri sölu.
Sánchez er 31 árs og lék með Inter að láni frá United á leiktíðinni. Náði hann sér ekki á strik með United eftir félagsskipti frá Arsenal 2018. Hann var á himinháum launum hjá United og hefur Inter samþykkt að borga honum sömu laun gegn því að hann komi á frjálsri sölu.
Sánchez skoraði aðeins fimm mörk í 45 leikjum með United, en hann var einn besti leikmaður Arsenal í áraraðir áður en leiðin lá til Manchester. Spilaði hann 28 leiki með Inter á leiktíðinni og skoraði fjögur mörk.