Fulham og Crystal Palace mætast í sjöttu umferð ensku úrvalsdeildarinnar í knattspyrnu á Craven Cottage í London klukkan 14 og hægt er að sjá leikinn í beinni útsendingu hér á mbl.is.
Útsendingin hefst kl. 13.30 með upphitun fyrir leikinn og er á sérvefnum Enski boltinn.
Þetta er nágrannaslagur í London og um stutt ferðalag að ræða hjá Crystal Palace úr Suður-London yfir á bakka Thamesárinnar í vesturhluta borgarinnar en um 13 kílómetrar eru á milli leikvanga liðanna.
Crystal Palace er með 7 stig eftir fimm leiki og er í fjórtánda sætinu en Fulham situr á botninum með aðeins eitt stig eftir fyrstu fimm leiki sína.