Joel Matip æfði með Englandsmeisturum Liverpool á æfingasvæði félagsins í morgun en félagið deildi myndum af æfingunni á samfélagsmiðlum sínum. Eru þetta góðar fréttir úr herbúðum Liverpool sem fær erkifjendur sína í Manchester United í heimsókn á Anfield á morgun.
Það er óvist hvort Matip sé tilbúinn í slaginn á morgun en engu að síður eru þetta góðar fréttir fyrir Liverpool sem hefur átt í miklum vandræðum með varnarmenn sína á tímabilinu. Matip tognaði í nára í 1:1-jafntefli liðsins gegn WBA í lok desember og hefur ekkert getað æft undanfarið.
Jürgen Klopp, knattspyrnustjóri Liverpool, var ítrekað spurður um stöðuna á Matip á blaðamannafundi sínum í gær og vildi Þjóðverjinn fá svör gefa. „Finnst ykkur það skynsamlegt hjá mér að segja ykkur að hann muni spila þegar hann hefur ekkert æft með liðinu?
Ég þarf að sjá hvernig hann stendur sig á æfingu og hvernig hann bregst við því að hafa ekki spilað í tæpar þrjár vikur. Við sjáum hvernig næstu dagar þróast en hann er ekki eini miðvörður okkar og við erum með leikmenn sem geta leyst hann af hólmi.“