Tottenham vann í dag öruggan 3:1-sigur á botnliði Sheffield United í ensku úrvalsdeildinni í fótbolta. Komust lærisveinar José Mourinho því aftur á sigurbraut eftir jafntefli við Fulham í síðasta leik.
Serge Aurier kom Tottenham yfir strax á fimmtu mínútu og Harry Kane tvöfaldaði forskotið fimm mínútum fyrir hálfleik og var staðan í leikhléi 2:0.
Sheffield United komst aftur inn í leikinn þegar David McGoldrick minnkaði muninn á 59. mínútu.
Aðeins þremur mínútum síðar skoraði Tanguy Mdombélé hins vegar stórkostlegt mark og tryggði Tottenham sigurinn.
Tottenham er í 4. sæti með 33 stig, þremur stigum frá toppliði Manchester United sem á leik til góða. Sheffield United er sem fyrr á botninum með aðeins fimm stig.