Þótt leikmenn stærstu knattspyrnufélaga Englands séu með há laun er ólíklegt að það hafi oft gerst í tíð Franks Lampards sem knattspyrnustjóra Chelsea að leikmenn hafi mætt of seint á æfingar liðsins.
Vefmiðillinn Teamtalk hefur birt mynd af reglum Chelsea um sektir leikmanna, undirritaðar af Lampard, og þar er sundurliðað hversu mikið þeir þurfa að greiða í sektarsjóðinn fyrir hinar ýmsu yfirsjónir.
Þar ber hæst sektina fyrir að vera of seinn á æfingu en hún nemur samkvæmt þessu 20 þúsund pundum, sem eru hvorki meira né minna en þrjár og hálf milljón íslenskra króna.
Sektirnar eru sundurliðaðar sem hér segir:
1: Of seinn í brottför liðs á leikdegi – 2,500 pund
2: Of seinn á staðinn fyrir æfingu – 2.500 pund (+ 2.500 fyrir hverjar 15 mínútur)
3: Of seinn í upphitun í líkamsræktinni – 1.000 pund
4: Of seinn í meðferð – 2.500 pund
5: Of seinn á liðsfund – 500 pund á mínútu
6: Of seinn á æfingu – 20.000 pund
7: Síminn hringir við borðhald liðsins eða á fundi – 1.000 pund
8: Mætir rangt klæddur í ferðalag og á leikdegi – 1.000 pund
9: Ferðast ekki með liðinu til baka frá leikstað, án þess að ræða það með 48 stunda fyrirvara við knattspyrnustjórann eða aðstoðarstjórann – 5.000 pund
10: Neitar að mæta eða skrópar í skylduverkefni innan félags eða samfélags – 5.000 pund
11: Segir ekki frá veikindum eða meiðslum fyrir frídag, eða 90 mínútum fyrir æfingu – 10 þúsund pund
12: Of seinn á fund læknis – 2.500 pund.
Og síðan er tekið fram að allar sektir eigi að greiða innan 14 daga, en eftir þann tíma tvöfaldist upphæðin.
Frank Lampard var sagt upp störfum í gær og því bíða leikmenn liðsins væntanlega spenntir eftir því að sjá hvaða áherslur arftaki hans, líklega Thomas Tuchel, verði með í sektargreiðslum.