„Mér fannst enginn leikmaður Liverpool eiga einhverja stjörnuframmistöðu sem er skrítið því Mohamed Salah skorar tvívegis og leggur svo upp mark líka,“ sagði þáttastjórnandinn Bjarni Helgason í Fyrsta sætinu þegar rætt var um enska boltann.
Liverpool er með þriggja stiga forskot á toppi ensku úrvalsdeildarinnar eftir sigur gegn Newcastle, 4:2, í 20. umferð deildarinnar á nýársdag á Anfield.
Darwin Núnez fékk svo sannarlega færin til þess að skora í leiknum en hann fór illa með nokkur dauðafæri gegn Newcastle.
„Salah er að fara núna í Afríkukeppnina og maður veltir því fyrir sér hver eigi eiginlega að skora mörkin fyrir Liverpool,“ sagði Bjarni en Salah er langmarkahæsti leikmaður Liverpool í deildinni með 14 mörk.
„Ég horfði á Darwin Núnez í leiknum og hann leggur mikið á sig og stuðningsmenn Liverpool elska hann og allt það en hann var að gera mig geðveikan. Hann hefði getað spilað fram á laugardag án þess að skora mark,“ sagði Bjarni meðal annars en Núnez hefur skorað fimm mörk í 19 leikjum í deildinni á tímabilinu.