Brentford og Manchester United skildu jöfn, 1:1, í lokaleik dagsins í ensku úrvalsdeildinni í fótbolta í kvöld. Komu bæði mörkin seint í uppbótartíma.
United er í sjötta sæti með 48 stig og Brentford í 15. sæti með 27 stig.
Brentford var töluvert sterkari aðilinn stóran hluta leiks og setti boltann fjórum sinnum í tréverkið á marki United.
Ivan Toney slapp einn í gegn á 24. mínútu en skaut í stöng, Zanka Jörgensen skallaði í slá á 32. mínútu, Youane Wissa skaut í stöng á 58. mínútu og Bryan Mbuemo negldi boltanum í slána á 78. mínútu.
United fékk fá færi en Rasmus Höjlund fékk þó úrvalsfæri til að skora fyrsta markið á 54. mínútu er hann slapp einn í gegn en Mark Flekken í marki Brentford varði stórkostlega frá honum.
Var staðan því markalaus fram að sjöttu mínútu uppbótartímans er varamaðurinn Mason Mount skoraði með hnitmiðuðu skoti í hornið fjær eftir sendingu frá Casemiro.
Bjuggust þá flestir við útisigri Manchester-liðsins en Kristoffer Ajer jafnaði á níundu mínútu uppbótartímans með góðu skoti úr teignum eftir sendingu frá Toney og þar við sat.