Manchester United komst aftur á sigurbraut er liðið hafði betur gegn Newcastle, 3:2, á heimavelli í næstsíðustu umferð ensku úrvalsdeildarinnar í fótbolta í kvöld.
United jafnaði Newcastle að stigum með sigrinum og eru þau bæði með 57 stig og berjast um sjöunda sæti og sæti í Sambandsdeildinni á næstu leiktíð.
Heimamenn komust yfir á 31. mínútu er Kobbie Mainoo skoraði eftir góða sendingu frá Amad Diallo. Reyndist það eina mark fyrri hálfleiks.
Newcastle byrjaði seinni hálfleikinn af krafti og Anthony Gordon jafnaði á 49. mínútu eftur fyrirgjöf frá Jacob Murphy.
Átta mínútum síðar komst United aftur yfir er Diallo negldi boltanum í netið eftir horn. Varamaðurinn Rasmus Höjlund gerði þriðja markið á 84. mínútu, mínútu eftir að hann kom inn á sem varamaður, er hann kláraði vel í teignum.
Lewis Hall minnkaði muninn með glæsilegu skoti í uppbótartíma en nær komst Newcastle ekki og Manchester United fagnaði kærkomnum sigri.