Karim Benzema, framherji Real Madrid og franska landsliðsins, hefur upplýst að hann muni ekki vera hluti af leikmannahópi Frakklands í lokakeppni Evrópumótsins í knattspyrnu á heimavelli í sumar. Franska knattspyrnusambandið hefur staðfest það sömuleiðis.
Framtíð Benzema með franska landsliðinu hefur verið í lausu lofti frá því fyrr í vetur, þegar hann var settur í tímabundið bann vegna atviks sem kom upp innan liðsins.
Á síðasta ári var Benzema ákærður fyrir fjárkúgunarbrot þar sem hann (ásamt félögum sínum) ætlaði sér að kúga út fé úr liðsfélaga sínum hjá franska landsliðinu, Mathieu Valbuena, gegn því að birta kynlífsmyndband af honum sem Benzema og hans föruneyti hafði undir höndum.
Meðal þeirra sem stigu fram þegar málið stóð sem hæst var Manuel Valls, forsætisráðherra Frakklands, sem sagðist ekki hrifinn af því að Benzema fengi tækifæri á ný með landsliðinu.
„Vegna yngri iðkenda þá á svona íþróttastjarna að sýna fordæmi. Fótboltinn er okkar þjóðararfur. Það er ekki bara eitthvað sem fólk hættir að hafa áhuga á. Hann mun vekja athygli. Allar gjörðir og ákvarðanir eru mikilvægar,” sagði Valls fyrr í vetur.
Fleiri fréttir mbl.is um mál Benzema má sjá í meðfylgjandi fréttaknippi.