Claudio Ranieri, þjálfari FC Nantes, sagði við franska fjölmiðla í morgun að hugmyndin hafi verið að gefa Kolbeini Sigþórssyni sinn fyrsta mótsleik í tvö ár gegn Saint-Étienne á sunnudaginn.
Líklegra er þó að ekkert verði af því þar sem Kolbeinn glímir við smávægileg meiðsli í nára. Kolbeinn var í landsliðshópnum sem mætti Mexíkó og Perú vestanhafs á dögunum en gat ekki æft með liðinu vegna meiðsla.
Á nýju ári hefur Kolbeinn unnið hörðum höndum að endurkomu sinni á knattspyrnuvöllinn. Hann skoraði tvö mörk fyrir varalið Nantes fyrr í mánuðinum og virðist aðeins tímaspursmál hvenær langþráði draumurinn verði að veruleika.