Aalesund hafði betur gegn Ull Kisa á heimavelli í norsku B-deildinni í fótbolta í dag, 3:2. Hólmbert Aron Friðjónsson skoraði annað mark Aalesund í leiknum úr vítaspyrnu og jafnaði í 2:2 á 66. mínútu.
Framherjinn hefur átt góðu gengi að fagna hjá Aalesund og skorað átta mörk í 12 leikjum í deildinni. Hólmbert lék allan leikinn í dag, eins og Aron Elís Þrándarson og Adam Örn Arnarson. Daníel Leó Grétarsson var hins vegar ekki í leikmannahópi Aalesund í dag.
Íslendingaliðið er með 26 stig eftir 12 leiki og með fjögurra stiga forskot á Sogndal á toppi deildarinnar.
Orri Sigurður Ómarsson lék allan leikinn fyrir HamKam sem tapaði fyrir Mjöndalen á útivelli, 2:1. HamKam er í 9. sæti með 16 stig.