„Við erum að fara að spila við eitt stærsta liðið á Norðurlöndunum. Þessi tími hjá fótboltamönnum er einn sá skemmtilegasti því þá skellur Evrópukeppnin á," sagði Ólafur Jóhannesson, þjálfari Vals, í samtali við mbl.is. Valur leikur við Rosenborg í forkeppni Meistaradeildar Evrópu í kvöld.
Ólafur hefur trú á sínum mönnum í leiknum og segir helsta muninn á liðunum vera líkamlegt atgervi leikmanna.
„Við höfum trú á að möguleikarnir okkar séu ágætir. Við trúum því að við getum unnið leikinn og við ætlum okkur að reyna það. Þetta lið spilar týpískan 4-3-3 bolta, ekkert ósvipaðan og við. Fljótt á litið eru liðin áþekk í fótbolta, en þeir eru í betra standi en við og þeir eru með meiri hlaupagetu."
Ólafur segir stærsta markmiðið framan af leik að verja markið.
„Í gegnum tíðina höfum við farið í þessa Evrópukeppni og fengið á okkur mörk á heimavelli sem er slæmt. Til að byrja með munum við verja markið okkar eins lengi og við þurfum og getum og sjá svo til hvaða aðstæður koma upp í leiknum."
Rosenborg tók reglulega þátt í riðlakeppni Meistaradeildar Evrópu í kringum aldamótin og hafði það fádæma yfirburði í norskum fótbolta.
„Þeir hafa ekki sömu yfirburði í Noregi og þeir höfðu þá. Þetta er ekki sama stórlið og það var fyrir nokkrum árum, en stórlið engu að síður sem er mjög vel mannað," sagði Ólafur.