Aron sendur heim úr æfingabúðum

Knattspyrnumaðurinn Aron Jóhannsson hefur verið sendur heim úr æfingabúðum þýska félagsins Werder Bremen í Zillertal í Austurríki.

Skýrt er frá því á heimasíðu Bremen að Aron og Jannes Vollert yfirgefi æfingabúðirnar í dag vegna meiðsla og fari til Bremen til meðhöndlunar af þeim sökum. Aron glímir við ökklameiðsli en þjálfari liðsins, Florian Kohfeldt, staðfesti þetta við heimasíðu félagsins.

Aron hefur verið í röðum Bremen í þrjú ár en hefur aðeins náð að spila samtals 27 leiki í þýsku 1. deildinni á þeim tíma. Hann hefur misst talsvert úr vegna meiðsla og þá var hann ekki í náðinni hjá þáverandi þjálfara liðsins um nokkurt skeið.

Bremen hafnaði í 11. sæti af 18 liðum í deildinni á síðasta tímabili og byrjar nýtt tímabil á heimaleik gegn Hannover 24. ágúst. Aron hefur því enn ágætt svigrúm til að jafna sig af meiðslunum í tæka tíð.

• Blogga um frétt