Enska knattspyrnufélagið Manchester City setti vafasamt met í Meistaradeild Evrópu í kvöld. City tapaði 2:1 fyrir franska liðinu Lyon á Etihad-vellinum í Manchester í 1. umferð riðlakeppni Meistaradeildarinnar en liðin leika í F-riðli keppninnar ásamt Shakhtar Donetsk og Hoffenheim.
City vann ensku úrvalsdeildina með miklum yfirburðum á síðustu leiktíð en liðinu hefur ekki gengið vel í Meistaradeildinni undanfarin ár. Athygli vekur að tapið í kvöld var fjórða tap liðsins í keppninni í röð.
City féll úr leik í Meistaradeildinni á síðustu leiktíð í átta liða úrslitum keppninnar en liðið tapaði fyrir Liverpool, 3:0, á Anfield og svo 2:1 á Etihad-vellinum í seinni leik liðanna. Þá tapaði liðið lokaleik sínum í riðlakeppninni á síðustu leiktíð gegn Basel, 2:1.
Tapið í kvöld var því fjórða tap Manchester City í Meistaradeildinni í röð en ekkert enskt lið hefur tapað fjórum leikjum í röð frá því Meistaradeildin var fyrst sett á laggirnar í núverandi mynd árið 1992.
4 - Manchester City are the first English team to lose four consecutive Champions League matches in the competition's history. Surprising. pic.twitter.com/of1x71hxC3
— OptaJoe (@OptaJoe) September 19, 2018