Gareth Bale, leikmaður Evrópumeistara Real, gæti átt yfir höfði sér allt að tólf leikja bann eftir umdeildan fögnuð hans þegar hann skoraði í borgarslag Real Madrid og Atlético Madrid um síðustu helgi.
Bale kom af varamannabekknum og skoraði þriðja mark Real Madrid. Hann fagnaði því fyrir framan stuðningsmenn Atlético Madrid á Wanda Metropolitano.
Í fögnuði sínum lyfti Bale hægri handleggnum upp að höfði sínu, var með ýmsar hreyfingar og með látbragði sínu ögraði hann stuðningsmönnum Atlético Madrid en þessi handarhreyfing er talin móðgandi á Spáni.
Forsvarsmenn spænsku deildarinnar hafa ritað formlegt kvörtunarbréf og mun aganefnd spænska knattspyrnusambandsins taka málið fyrir. Hann gæti fengið fjögurra til tólf leikja bann ef hann verður fundinn sekur.