Íþróttir | Fótbolti | mbl | 10.6.2019 | 8:23 | Uppfært 10:08

Utanríkisráðherrann ósáttur með meðferðina

Tyrkneska landsliðið í fótbolta mætti til Íslands í gær, en þeir keppa við íslenska landsliðið á morgun í undankeppni EM. AFP

Mevlüt Çavuşoğlu, utanríkisráðherra Tyrklands, hefur blandað sér inn í umræðuna um meðferðina á tyrkneska landsliðinu á Keflavíkurflugvelli, en á Facebook-síðu sinni gagnrýnir hann framkomuna.

Eins og greint var frá í gær tók það langan tíma fyrir leikmennina að komast í gegnum vegabréfaskoðun og samtals um þrjár klukkustundir að komast í gegnum flugvöllinn. Þá veifaði einhver uppþvottabursta að fyrirliða liðsins þar sem hann gekk framhjá blaðamönnum í flugstöðinni.

Frétt af mbl.is

Hver er með uppþvottaburstann?

Í færslunni segir Çavuşoğlu að framkoman gagnvart landsliðinu sé óásættanleg út frá diplómatískum og mannréttindalegum sjónarmiðum.

Stuðningsmenn tyrkneska liðsins eru heldur ekki sáttir með langan afgreiðslutíma í Keflavík eða uppþvottaburstann. Hafa reyndar margir talið að þar sé um klósettbursta að ræða. Höfðu nokkur þúsund athugasemdir verið skrifaðar við nýjustu færslu KSÍ á Facebook og miður fallegum kveðjum látið rigna yfir knattspyrnusambandið og Íslendinga.