CSKA Moskva vann sinn fyrsta sigur í rússnesku úrvalsdeildinni á leiktíðinni er liðið lagði Orenburg í annarri umferðinni í dag. Arnór Sigurðsson skoraði annað mark CSKA á 38. mínútu.
Arnór var í byrjunarliðinu og kom CSKA í 2:0 með marki sínu. Markið var mjög fallegt, en Arnór rak þá endahnútinn á glæsilega sókn með viðstöðulausi skoti upp í hornið úr teignum. Arnór átti stóran þátt í uppbyggingu sóknarinnar og kláraði svo sjálfur.
Skagamaðurinn fékk gult spjald á 80. mínútu eftir átök við Sergei Terekhov, leikmann Orenburg. Hörður Björgvin Magnússon lék allan leikinn fyrir CKSA. CSKA Moskva er með þrjú stig eftir tvær umferðir í níunda sæti.
Mark Arnórs má sjá hér fyrir neðan, en það kemur eftir rúmlega 42 mínútur í myndbandinu.