Knattspyrnumaðurinn Cristiano Ronaldo verður ekki ákærður fyrir nauðgun, þrátt fyrir að Kathryn Mayorga frá Bandaríkjunum hafi sakað hann um glæpinn á hótelherbergi í Las Vegas í júní árið 2009.
Ronaldo hefur ávallt neitað sök og var málinu lokað eftir stutta rannsókn árið 2009. Rannsóknin fór hins vegar aftur af stað þegar Mayorga höfðaði einkamál gegn Ronaldo í september á síðasta ári.
Umdæmissaksóknari Clark County í Nevada-ríki í Bandaríkjunum kom með tilkynningu í dag þess efnis að rannsókn málsins væri lokið. Ekki væru til nægar sannanir gegn Ronaldo til að fara með málið í dómsal.