Toppslagur Juventus og Inter Mílanó í ítölsku efstu deildinni í knattspyrnu verður leikinn fyrir luktum dyrum í Torino á sunnudaginn en honum verður ekki aflýst. Útbreiðsla kórónuveirunnar á Norður-Ítalíu hefur raskað deildarkeppninni þar í landi en ekki stendur til að aflýsa leikjum um helgina.
Juventus er á toppi deildarinnar og fær Inter, sem er sex stigum neðar í 3.sæti, í heimsókn á sunnudaginn. Vincenzo Spadafora, íþróttamálaráðherra Ítalíu, hefur staðfest að leikurinn fer fram en fyrir luktum dyrum eftir fund í ráðuneytinu fyrr í dag.
Sjö hafa látist á Norður-Ítalíu vegna veirunnar en stjórnvöld hafa brugðið á það ráð að setja yfir 50.000 manns í farbann í bæjum og þorpum þar sem kórónuveiran, COVID-19, hefur greinst í yfir 200 manns.
Leikur Inter Mílanó og Ludogorets sem fram fer í Evrópudeildinni í kvöld verður einnig lokaður almenningi en í síðustu viku var tveimur leikjum frestað. Aftur á móti munu leikir á Suður-Ítalíu, t.d. í Napoli og Lecce, fara fram með venjulegum hætti.