Danski knattspyrnumaðurinn Nicklas Bendtner er nú án félags eftir að samningur hans við FC Kaupmannahöfn rann út um áramótin. Óvíst er hvort Bendtner heldur áfram að spila eða leggur skóna á hilluna.
„Ég hef ekki ákveðið neitt enn þá. Ef ég held áfram að spila fótbolta geri ég það á mínum eigin forsendum. Ég á eftir að skoða það betur,“ sagði Bendtner við BT í Danmörku. Hann segir koma til greina að fara í þjálfun.
„Ég vil mennta mig sem þjálfari og ég veit ég get orðið góður þjálfari. Ég vona að ég verði orðinn aðalþjálfari hjá góðu liði í kringum fertugt,“ bætti framherjinn við.