Norðmaðurinn Erling Haaland er ekki smeykur fyrir leik Dortmund og Bayern München en liðin mætast í toppslag þýsku efstu deildarinnar í dag.
Þegar sjö umferðum er ólokið er Bayern með fjögurra stiga forskot á Dortmund og með sigri Bæjara myndu sjö stig skilja liðin að. Dortmund myndi hins vegar hleypa gríðarlegri spennu í baráttuna með sigri.
„Pressan angrar mig ekki, þetta eru leikirnir sem ég vil spila,“ sagði Haaland í viðtali sem birtist á heimasíðu Dortmund. Norðmaðurinn kom til þýska félagsins í janúar og hefur skorað tíu mörk í jafnmörgum deildarleikjum en hann er einn öflugasti framherji Evrópu um þessar mundir.
„Hjá Bayern eru leikmenn sem hafa orðið heimsmeistarar en við eigum slíka leikmenn innanborðs líka,“ bætti sá norski við og vísaði þar til Mats Hummels og Mario Götze sem urðu heimsmeistarar með Þjóðverjum 2016.