Phil Neville vill ólmur taka við félagsliði þegar samningur hans við enska kvennalandsliðið í knattspyrnu rennur út á næsta ári. Neville ætlar ekki að halda áfram sem landsliðsþjálfari.
Neville tók við enska liðinu í ársbyrjun 2018 og undir hans stjórn vann liðið stórmót nokkurra bestu liða heims, SheBelieves-bikarinn, og endaði í fjórða sætinu í lokakeppni HM á síðasta ári. Liðið hefur hinsvegar mátt þola sjö ósigra í síðustu ellefu leikjum sínum og Neville hefur fengið talsverða gagnrýni í kjölfarið.
Til stóð að hans síðasta verkefni yrði að stjórna enska liðinu á EM á Englandi þá um sumarið en Evrópumótinu hefur nú verið frestað um eitt ár. Ekki liggur fyrir hvort hann stjórni liði Bretlands á Ólympíuleikunum í Tókýó sumarið 2021 eins og til stóð en það er alla vega ljóst að hann hættir að samningnum loknum.
„Ég ætlaði mér alltaf að þjálfa England í þrjú ár og reyna svo fyrir mér með félagsliði. Ég hef elskað hverja mínútu hérna en ég hitti ekki leikmennina nógu oft eða fæ að hafa áhrif á þá á hverjum degi, sem er það sem ég vil,“ sagði Neville í samtalið við beIN Sports.