Færeyski knattspyrnumaðurinn Adrian Justinussen, sem vann það ótrúlega afrek um síðustu helgi að setja heimsmet er hann skoraði þrennu úr aukaspyrnum á átta mínútum, varð fyrir áfalli í gær en hann fótbrotnaði í leik HB og Viking í efstu deildinni.
HB vann leikinn 3:0 og er með fullt hús stiga eftir fjórar umferðir í deildinni. Liðið þarf þó að vera án markaskorarans knáa næstu vikurnar samkvæmt frétt KVF sem segir aukaspyrnusérfræðinginn hafa farið sárkvalinn af velli í gærkvöldi.
Justinussen er aðeins 21 árs gamall en engu að síður búinn að skora 45 deildarmörk í 112 leikjum í Færeyjum. Heimir Guðjónsson stýrði liði HB síðustu tvær leiktíðir og gerði liðið að bæði deildar- og bikarmeisturum og var Justinussen meðal markahæstu manna bæði árin en hann skoraði 36 mörk undir stjórn Heimis.