Ef marka má fregnir þýskra og enskra fjölmiðla virðist nær öruggt að Leroy Sané, sóknarmaður enska knattspyrnufélagsins Manchester City, muni ganga til liðs við Þýskalandsmeistara Bayern München í sumar. Ein gömul Bayern-kempa segir sitt gamla félag þó vera að gera hræðileg mistök.
Sané, sem er 24 ára gamall, hefur verið sterklega orðaður við endurkomu í þýsku Bundesliguna að undanförnu. Hann gekk til liðs við City frá Schalke árið 2016 og hefur því leikið á Englandi undanfarin fjögur ár. Sané verður samningslaus sumarið 2021 en hann hefur ekki viljað skrifa undir nýjan samning á Englandi. City þarf því að selja leikmanninn í sumar ef félagið ætlar sér að fá eitthvað fyrir hann en hann er verðmetinn á 80 milljónir evra.
„Hann á ekkert sameiginlegt með Bayern og þeim leikmönnum sem þar eiga að spila,“ sagði Willy Sagnol við RMC. Sagnol var vinstri bakvörður Bayern frá 2000 til 2009 og vann fjölda titla með félaginu.
„Hann hentar félaginu ekki, alls ekki. Hann hefur átt í endalausum vandræðum bæði hjá City og landsliðinu. Þeir eru að tala um 80 milljónir fyrir hann, frekar myndi ég borga auka 20 og kaupa Kai Havertz,“ bætti hann við og vísaði þar í sóknarmanninn unga hjá Leverkusen sem hefur verið frábær í ár.