Upp hefur komið eitt staðfest smit af kórónuveirunni hjá knattspyrnufélaginu FC København sem landsliðsmaðurinn Ragnar Sigurðsson spilar með en danski boltinn hóf göngu sína á ný í síðustu viku.
Félagið staðfestir þetta á heimasíðu sinni og segir að markmannsþjálfarinn Kim Christiensen hafi verið greindur með veiruna. Í kjölfar hefur hann verið sendur í einangrun og voru allir leik- og starfsmenn félagsins skimaðir til öryggis en enginn annar hefur smitast. Það er því ólíklegt að þetta smit muni koma til með að riðla leikjaprógrami liðsins sem á að mæta Randers á heimavelli á sunnudaginn. Allir sem koma að dönsku úrvalsdeildinni eru skimaðir einu sinni í viku á meðan veirufaraldurinn gengur yfir.
Ragnar gekk í raðir Kaupmannahafnar í janúar og gerði skammtímasamning við sitt gamla félag. Hann er orðinn 34 ára gamall og var ekki í leikmannahóp liðsins í fyrsta leik eftir veiruhlé um síðustu helgi.