Xavi Hernandez, fyrrverandi fyrirliði knattspyrnuliðs Barcelona, hefur verið orðaður við endurkomu til félagsins sem knattspyrnustjóri en hann hefur þjálfað Al Sadd í Katar frá því á síðasta ári með góðum árangri.
Hefur Spánverjinn hinsvegar gert nýjan samning við Al Sadd sem gildir til ársins 2021. Segir í fréttatilkynningu félagsins að Xavi sé með fulla einbeitingu á að takast á við komandi verkefni hjá Al Sadd.
Framtíð Quique Setién, núverandi stjóra Barcelona, er í mikilli óvissu en hann tók við liðinu í janúar á þessu ári af Ernesto Valverde sem var látinn taka pokann sinn. Gengi liðsins undir stjórn Setién hefur hins vegar verið óstöðugt en liðið er nú fjórum stigum á eftir toppliði Real Madrid í spænsku 1. deildinni þegar fimm umferðir eru eftir af tímabilinu.
Xavi lék með aðalliði Barcelona frá 1998 til 2015, alls 767 leiki og er hann goðsögn hjá félaginu.