Hollenski knattspyrnumarkvörðurinn Maarten Stekelenburg er kominn aftur til Ajax á frjálsri sölu frá Everton, níu árum eftir að hann yfirgaf hollenska félagið.
Stekelenburg, sem er 38 ára, hefur verið varamarkvörður Everton síðustu fjögur ár, en þar á undan lék hann með Southampton, Fulham og Roma.
Hefur Stekelenburg leikið 58 landsleiki og var hann m.a. aðalmarkvörður í hollenska liðinu sem vann silfur á HM 2010.
Andre Onana, aðalmarkvörður Ajax síðustu ár, hefur verið orðaður við Chelsea, en enska félagið ku vilja losa sig við Spánverjann Kepa Arrizabalaga.