Andrea Pirlo hefur tekið við knattspyrnustjórastöðu Juventus eftir að Maurizio Sarri var rekinn fyrr í dag. Pirlo, sem er 41 árs, lagði skóna á hilluna árið 2017 eftir magnaðan feril.
Brottrekstur Sarris var gerður opinber í dag en Juventus féll úr keppni í Meistaradeild Evrópu í gærkvöldi í 16-liða úrslitum. Juventus vann 2:1 en féll úr keppni þar sem Lyon skoraði mark á útivelli og hafði unnið heimaleikinn 1:0. Sarri var því snarlega rekinn úr starfi þrátt fyrir að hafa gert liðið að ítölskum meisturum níunda árið í röð en hann tók við liðinu á síðasta ári.
Pirlo var ráðinn á dögunum til Juventus til að gegna starfi þjálfara hjá U23 ára liði félagsins en þurfti ekki að bíða lengi eftir stöðuhækkun. Hann lék 116 landsleiki fyrir Ítalíu og varð heimsmeistari árið 2006. Hann varð ítalskur meistari fjórum sinnum með Juventus. Þá varð hann Evrópumeistari í tvígang með AC Milan á sínum tíma.
Miðjumaðurinn yfirgaf Juventus árið 2015 og lék síðustu ár ferilsins í Bandaríkjunum með New York City. Síðustu ár hefur Pirlo öðlast þjálfararéttindi frá FIFA og hafnað nokkrum starfstilboðum að sögn blaðamannsins Zekes Tells.