Ítalska knattspyrnufélagið AC Milan tilkynnti fyrir stundu að tveir leikmanna liðsins hefðu greinst með kórónuveiruna.
Það eru ítalski landsliðsmarkvörðurinn Gianluigi Donnarumma og Norðmaðurinn Jens Petter Hauge, en áður höfðu þrír í leikmannahópi liðsins greinst með veiruna.
Donnarumma og Hauge hafa verið sendir heim til sín í einangrun og verða ekki með liðinu í kvöld þegar það tekur á móti Roma í A-deildinni. AC Milan hefur byrjað tímabilið mjög vel og unnið fjóra fyrstu leiki sína. Donnarumma hefur varið markið í öllum leikjunum en norski miðjumaðurinn Hauge, sem er 21 árs gamall, hefur komið við sögu í einum leik.
Í tilkynningu frá félaginu segir að leikmennirnir séu við góða heilsu, án einkenna, og allir aðrir leikmenn liðsins hafi verið skimaðir í gær, samkvæmt reglum, og enginn þeirra hafi reynst smitaður.
Ciprian Tatarusanu, landsliðsmarkvörður Rúmena sem lék gegn Íslandi á Laugardalsvellinum 8. október, fær væntanlega sitt fyrsta tækifæri með AC Milan í deildinni í kvöld. Hann kom til félagsins frá Lyon í Frakklandi í sumar og hefur verið varamarkvörður fyrir Donnarumma í fyrstu fjórum leikjunum.