Forráðamenn spænska stórveldisins Real Madríd vilja að fyrirliðinn Sergio Ramos samþykki launalækkun en hann hafnaði samningstilboði frá félaginu á dögunum.
Ramos, sem er orðinn 34 ára gamall, gekk til liðs við Real Madrid frá uppeldisfélagi sínu Sevilla árið 2005 og hefur verið lykilmaður í liðinu síðan en hann var gerður að fyrirliða árið 2015. Núverandi samningur hans rennur út í sumar og er hann sagður vilja vera áfram hjá Real en samkvæmt spænska miðlinum ABC vill hann tveggja ára framlengingu.
Félagið hefur hins vegar boðist til að framlengja samninginn um eitt ár og sömuleiðis beðið hann að lækka laun sín um tíu prósent en kórónuveirufaraldurinn hefur haft áhrif á fjárhag félagsins. Ramos á að baki næstum 700 leiki fyrir Real Madrid þar sem hann hefur skorað 100 mörk en hann hefur fimm sinnum orðið Spánarmeistari með liðinu og fjórum sinnum Evrópumeistari.