Atalanta gerði sér lítið fyrir og vann topplið AC Milan örugglega á San Siro-vellinum í ítölsku A-deildinni í knattspyrnu í dag. Leiknum lauk með 3:0 sigri Atalanta.
Fyrsta markið gerði miðvörðurinn Cristian Romero á 26. mínútu þegar hann skallaði boltann í netið eftir að hafa fengið góða fyrirgjöf inn í teiginn frá Robin Gosens í kjölfar stuttrar hornspyrnu.
Staðan í hálfleik var 1:0 og snemma í síðari hálfleik tvöfaldaði Atalanta forystu sína. Þá braut Franck Kessie illa á Josip Ilicic inni í vítateig og vítaspyrna réttilega dæmd, auk þess sem Kessie fékk gult spjald. Ilicic steig sjálfur á vítapunktinn og skoraði af öryggi, 2:0.
Á 77. mínútu kláraði Atalanta leikinn endanlega. Þá átti miðvörðurinn Romero góða sendingu inn fyrir á framherjann Duvan Zapata, sem var sloppinn í gegn og kláraði örugglega framhjá Gianluigi Donnarumma í marki AC Milan.
3:0 lokatölur og Atalanta komið upp í fjórða sæti deildarinnar.
AC Milan heldur þrátt fyrir tapið toppsætinu þar sem grannar þeirra í Inter misstigu sig á sama tíma með því að gera markalaust jafntefli gegn Udinese.
Inter er nú tveimur stigum á eftir AC Milan í öðru sæti deildarinnar.