Guðlaugur Victor Pálsson fór fyrir sínum mönnum í Schalke þegar hann bar fyrirliðabandið í afar sterkum 3:0-útisigri gegn Holstein Kiel í þýsku B-deildinni í knattspyrnu í dag.
Schalke, sem féll úr þýsku 1. deildinni á síðasta tímabili, hóf tímabilið afar illa þegar liðið tapaði 1:3 á heimavelli gegn Hamburg.
Í dag var sigurinn hins vegar aldrei í hættu eftir að Simon Terodd hafði skorað strax á annarri mínútu og svo aftur á 21. mínútu leiksins.
Í síðari hálfleik batt Marius Bülter endahnútinn á flotta frammistöðu og þriggja marka sigur staðreynd í annarri umferð B-deildarinnar.
Guðlaugur Victor er varafyrirliði Schalke og var með bandið í fjarveru Dannys Latza, sem var ekki í leikmannahópnum í dag.
Hólmbert Aron Friðjónsson var ekki í leikmannahópi Holstein Kiel í dag.