Einn sá eftirsóttasti hafnaði nýju samningstilboði

Serbneski framherjinn Dusan Vlahovic, leikmaður ítalska knattpyrnufélagsins Fiorentina, hefur hafnað tilboði um nýjan samning og er því væntanlega á förum frá félaginu á næsta ári.

Núverandi samningur hins 21 árs gamla Vlahovic rennur út sumarið 2023 og viðurkennir forseti Fiorentina, Rocco Commisso, að félagið muni þurfa að finna farsæla lausn á málum hins mikla markaskorara, sem þýðir að selja þurfi hann á næsta ári svo hann fari ekki á frjálsri sölu á þarnæsta ári.

Í yfirlýsingu á heimasíðu Fiorentina skrifar Commisso að Vlahovic hafi hafnað samningstilboði félagsins, sem hefði gert hann að launahæsta leikmanni í sögu þess.

Vlahovic fór á kostum í ítölsku A-deildinni á síðasta tímabili þegar hann skoraði 21 mark í 37 deildarleikjum. Fjöldi stórliða sýndu honum af þeim sökum áhuga síðasta sumar en Vlahovic hélt þó kyrru fyrir í Flórens.

Hann hefur byrjað þetta tímabil af álíka krafti þar sem hann er kominn með fjögur mörk í sjö deildarleikjum, auk tveggja marka í einum bikarleik.

Því er ljóst að ekki mun áhuginn á Vlahovic minnka haldi hann uppteknum hætti í markaskorun sinni og ekki síður með tilliti til samningsstöðu hans.

• Blogga um frétt