Emil áfram á Ítalíu

Knattspyrnumaðurinn Emil Hallfreðsson hefur framlengt samning sinn við ítalska C-deildarfélagið Virtus Verona um eitt ár.

Emil, sem varð 38 ára í síðasta mánuði, kom til Verona-félagsins frá Padova fyrir síðustu leiktíð. Hann hefur leikið á Ítalíu frá árinu 2007 er hann gekk í raðir Reggina frá Lyn í Noregi.

Síðan þá hefur hann leikið með Hellas Verona, Udinese, Frosinone, Padova og loks Virtus Verona.

Liðið endaði í 13. sæti af 18 liðum í C-deildinni á síðustu leiktíð og var aðeins einu stigi frá tíunda sæti, sem gefur sæti í umspili um sæti í B-deildinni.

Emil hefur leikið 428 deildaleiki á ferlinum og aðeins þrír íslenskir knattspyrnumenn sem enn eru að spila eiga fleiri leiki að baki, þeir Aron Einar Gunnarsson, Pálmi Rafn Pálmason og Ari Freyr Skúlason.

• Blogga um frétt