Rúnar Alex Rúnarsson, landsliðsmarkvörður í knattspyrnu, er á leið til tyrkneska úrvalsdeildarfélagsins Alanyaspor að láni frá enska úrvalsdeildarfélaginu Arsenal.
Tyrkneski blaðamaðurinn Ertan Süzgün greinir frá. Alanyaspor hafnaði í fimmta sæti tyrknesku úrvalsdeildarinnar á síðustu leiktíð.
Rúnar er aftarlega í goggunarröðinni hjá Arsenal og er félagið reiðubúið að láta hann fara. Rúnar var að láni hjá Leuven í Belgíu á síðustu leiktíð. Hann hefur leikið 17 landsleiki fyrir Íslands hönd.