Stuðningsmenn Breiðabliks voru allt annað en sáttir þegar Dan Biton kom Maccabi Tel Aviv yfir í leik liðanna í B-riðli Sambandsdeildar karla í knattspyrnu á Kópavogsvelli í dag.
Biton kom Maccabi Tel Aviv yfir á 35. mínútu en hann fagnaði með því að hlaupa í átt að varamannabekk liðsins þar sem beið hans stór ísraelskur fáni.
Hann veifaði svo fánanum beint upp í stúku í átt að stuðningsmönnum liðanna við lítinn fögnuð viðstaddra.
Upp úr sauð á milli liðanna eftir þetta og þá var einum stuðningsmanni Breiðabliks vísað úr stúkunni vegna háttsemi hans eftir að Biton fagnaði marki sínu.