Fílabeinsströndin er Afríkumeistari karla í fótbolta eftir sigur á Nígeríu í úrslitaleik Afríkumótsins í kvöld, 2:1.
Mótið fór fram á Fílabeinsströndinni og vann heimaþjóðin sigur á mótinu, áhorfendum til mikillar gleði.
Það var hins vegar Nígería sem komst yfir í úrslitaleiknum í dag en varnarmaðurinn William Troost-Ekong skoraði með skalla á 38. mínútu.
Heimamenn gáfust ekki upp og náðu að jafna metin á 62. mínútu þegar Franck Kessie skoraði með skalla. Það var síðan framherji Dortmund, Sebastian Haller, sem innsiglaði sigur Fílabeinsstrendinga á 81. mínútu þegar hann skoraði af stuttu færi.
Nígeríumenn reyndu hvað þeir gátu að jafna metin en allt kom fyrir ekki og fögnuðu heimamenn langþráðum sigri en þetta er í fyrsta sinn síðan árið 2015 sem Fílabeinsströndin fagnar sigri í Afríkumótinu.